"நீங்க செய்த தவறுகளை மன்னிச்சுட்டேன்"-பெரியவா

(பெரியவா என்ன சொன்னாலும் அதிலேஒரு தர்ம சூக்ஷ்மம் இருக்கும் நமக்குத்தான்
புரியமாட்டேங்கிறது!")

கட்டுரையாளர்-ஸ்ரீமடம் பாலு-22
தட்டச்சு-வரகூரான் நாராயணன்
புத்தகம்-காஞ்சி மகான் தரிசனம்.

வசார - அனுஷ்டானம், குரு பக்தியில் சிறந்து
விளங்கும் ஒரு வாத்திம கிராமத்தில், நான்கு நாள்
முகாம் செய்துவிட்டு,அடுத்த முகாம் அரசவனங்காடு
என்ற கிராமத்துக்குப் புறப்பட்டார்கள் பெரியவா.

பெரியவாளை வழியனுப்ப, கிராமத்தார் கொஞ்சம்
தொலைவு நடந்து வந்தார்கள்.உத்தரவு பெற்றுத்
திரும்பிவிட வேண்டிய கட்டம்.

பெரியவாள்,....."நீங்க செய்த தவறுகளை

மன்னிச்சுட்டேன்" என்று சொல்லி, கையைத் தூக்கி

ஆசீர்வதித்து விடை கொடுத்தார்கள்.கிராமத்தாருக்கு
'திக்'கென்றிருந்தது.

"தவறுகளை மன்னிச்சுட்டேன்!"
பார்த்துப் பார்த்து ஏற்பாடுகளைச் செய்தோமே?

பெரியவாளுக்கோ, பரிவாரங்களுக்கோ எந்த

அசௌகரியமும் ஏற்பட்டு விடக்கூடாது என்று
இராப்பகலாய் உழைத்தோமே!"

அன்றிரவு முழுவதும் யாருக்கும் தூக்கம் வரவில்லை.

'தப்பு - தவறு என்று எங்கே வந்தது?எப்படி வந்தது?
பணத்தைத் தண்ணீராகச் செலவழித்தோமே?
கிராமமே திருவிழா கோலம் பூண்டிருந்ததே? 

பந்தி பந்தியாகச் சாப்பாடு-வாய்க்கு வாய் உபசரணை'

"ஏண்டா சீனு,தப்பு எங்கேடா நடந்திருக்கும்?"

"அதான் மாமா எனக்கும் புரியலை;
பெரியவாள் ரொம்ப சந்தோஷமாதானே இருந்தா!"

"மனசு தவிக்கிறதுடா..."

எல்லாருக்கும்தான்.

மறுநாள் பொழுது விடிந்தது. பத்துப் பதினைந்து
முக்கியஸ்தர்கள் புறப்பட்டு அரசவனங்காடு சென்று

பெரியவாள் முன்பு நெடுஞ்சாண்கிடையாக விழுந்தார்கள்

முகங்களில் தவிப்புடன் அடக்கமாக நின்றார்கள்.

பெரியவாளுக்கு சிரிப்பு வந்தது.

"என்ன தப்பு நடந்ததுன்னு கேட்டு, மன்னிப்புக்
கேட்க வந்தேளாக்கும்."-பெரியவா

தாக்குதலைத் தாங்கிக் கொள்ள தயாராக இருந்தார்கள்.

"ஒரு தப்பும் நடக்கல்லே...."-பெரியவா

"அப்படியானால் விடை கொடுக்கும்போது
ஏன் அந்த பிரம்மாஸ்திரம்?"

பெரியவா சொன்னார்கள்;

"ஒரு சந்நியாசி ஊரை விட்டுப் போகும்போது,
அவரிடம் - 'நாங்க முடிஞ்சவரை சேவை செய்தோம்.
ஏதாவது தவறு நேர்ந்திருந்தால் மன்னிக்கணும்
என்று சொல்வது கிராம சம்பிரதாயம். நேற்றைக்கு
நீங்க அதைச் சொல்லலே! அதை ஞாபகப்படுத்தினேன்.

அவ்வளவுதான். ராஜோபசாரம் பண்ணினேள்.
க்ஷேமமாக இருக்கணும்."

வெளியே வந்தார்கள்.

எல்லார் முகத்திலும் அசாதாரணமான திருப்தி.
"ராத்திரி முழுக்க எப்படித் தவிச்சுப் போயிட்டோம்.."

"ஆனா...பெரியவா என்ன சொன்னாலும் அதிலே
ஒரு தர்ம சூக்ஷ்மம் இருக்கும் நமக்குத்தான்
புரியமாட்டேங்கிறது!"