ஒரு முறை ப்ரதோஷம் மாமா இல்லத்திற்கு பிரபல வயலின் வித்வான்கள் திரு.கணேஷ் திரு.குமரேஷ் ஆகிய இருவரும் வந்தனர். பெரியவா ப்ரசாதமாக 'தங்கக் காசு' வேண்டும் என வாய்விட்டு மாமாவிடம் கேட்டனர். மாமாவும் உடனே 'அடுத்த மாதம் 23ஆம் தேதி வாருங்கள் கிடைக்கும்' என சொல்லி அனுப்பினார். அடுத்த மாதம் நடந்தது அதிசயம்.

இவர்களை அழைத்து வந்த கடம் வித்வான் திரு.சுபாஷ் சந்திரன் பெரியவாளின் அருள், மாமாவின் பக்தி இரண்டையும் நன்கு அறிந்தவராததால் மறுமாதம் 23ம் தேதி குறிப்பிட்டபடி வயலின் சகோதரர்களை காஞ்சிக்கு அழைத்துச் சென்றார். முதலில் ஸ்ரீமடம் சென்று மாமுனியை தரிசித்து இசை அஞ்சலி செலுத்திவிட்டு ப்ரதோஷம் மாமா வீட்டிற்கு கிளம்புவதற்காக பெரியவாளிடம் உத்தரவு கேட்டு நிற்கையில் பெரியவர் இவர்களுக்கு இரண்டு தங்கக் காசுகளைக் கொடுத்து ஆசிர்வதித்து ப்ரசாதமும் அருள இன்ப அதிர்ச்சியில் சிலையாய் நின்றனர். ஒரு மாதத்திற்கு முன்பு தன் பக்தன் கொடுத்த வாக்கை நிறைவேற்ற எப்படி அருள் விளையாடல் புரிகிறார் இந்த மஹாஞானி! தன்னை உளமார நம்பும் அடியவர்கள் வாக்கை காக்க விரதம் கொண்ட வள்ளல் அன்றோ நம் காஞ்சி மஹான்.

இப்படி ஒரு தரம் மட்டுமா? தான் வேறு, தன் பக்தர் வேறல்ல என்று உறுதி செய்வது போல அடுக்கடுக்காக பல லீலைகள்.