வசதியுள்ளவர்களால் தான் பண உதவி செய்து புண்ணியம் பெற முடியும், நாம் என்ன செய்யலாம் ? என்ற மற்றவர்கள் எண்ணக் கூடாது. சரீரத்தால் மற்றவர்களுக்குப் கைங்கர்யம் செய்வது பெரிய புண்ணியம். அது சித்த சுத்திக்கு ரொம்ப ரொம்ப உதவும். வசதியே இல்லாதவர்களுக்கும இவ்விதத்தில் பிறருக்குச் சரீர சகாயம் செய்ய முடியும்.
ஒவ்வொருத்தரும் பிறருக்குக கூடத் தெரிய வேண்டாம் - எதோ ஓர் ஒற்றையடிப் பாதைக்கு போய் அங்கே உள்ள முள்ளை, கண்ணாடியை அப்புறப்படுத்தி வந்தால் போதும். அது சித்த சுத்திக்கும் பெரிய உதவி. இது மாதிரி சின்ன தர்மங்களை எவரும் செய்யலாம். பணக்காரர், ஏழை என்ற வித்தியாசமில்லாமல் ஒரு பேட்டையில் உள்ள அனைவரும் சேர்ந்து குளம் வெட்டலாம்.
ஈஸ்வர அனுக்ரகம் வேண்டும், வேண்டும் என்றால் அது எப்படி வரும் ? பரோப்காரமான, ஜீவகாருண்யமான நல்ல காரியங்களைச் செய்து செய்து மனசு பக்குவப்பட்டால்தான், சித்த சுத்தி உண்டாகி, அந்தச் சுத்தமான சித்தத்தில் ஈஸ்வரனின் உருவத்தைப் பார்க்க முடியும்.
கலங்கிய ஜலத்தில் பிம்பம் தெரியாதது போல் நாம் மனசிக் கலக்கிக் கொண்டு ஈஸ்வர ஸ்வருபம் தெரியாதபடிச் செய்து கொண்டிருக்கிறோம். பகவத் பக்தியோடு பரோபகாரமும் செய்து மனசு தெளிவாகும்போது, ஈஸ்வராநுக்ரகத்தை நாம் கிரகித்துக் கொள்ள முடியும்.
- பரமாச்சார்யார் (கல்கி அருள்வாக்கு)